Eina heila flogvallarbreyt frá veruleikanum

Fyrst av øllum vil eg ynskja Tobba tillukku, nú hann hevur klárað at kludra málið um flogvøllin upp í ein ellubita, sami Tobbi, sum sendi teldupost til mín í síðstu viku, har hann fortaldi mær, at hansara støða í flogvallarmálinum er, at Vága Floghavn skal útbyggjast, og ongantíð ov skjótt!

Tobbi skrivar í grein síni, at um vit byggja Vága Floghavn út á 1800 metrar, so kann hon  ikki brúkast til onnur flogfør, enn tey, sum Atlantic Airways hevur, og at tað er skilaleyst, tí hesi flogfør vera ikki gjørd meira.

Eg veit ikki, hvussu stutt minni hjá Tobba er, men eg kann minna á, at Maersk Air hevur opererað til og frá Vága Floghavn síðan 70-árini við Boeing 737, sum er mest brúkta flogfar í heiminum, eisini í dag, og verða hesi flogfør brúkt til ferðafólkaflutning t.d. millum París og London, Kastrup, Oslo, Bruxel o.s.fr., so eg haldi, at hetta slag eisini skuldi verið ok til okkum 48000 í Føroyum.

Síðstu tíðuna Maersk Air fleyg upp á Vágar, brúktu teir Boeing 737-700, sum tekur 140 fólk, so okkurt kann Vága Floghavn brúkast til kortini!

Vøllurin í Vágum er í dag 1250 metur, og um vit byggja hann út á 1800 metur, kunnu flogfør sum t.d. Boeing 757 flúgva uppá Vágar. Hetta eru flogfør, sum taka væl yvir 200 ferðafólk, so eg veit ikki, hvat Tobbi byggjur sín pástand uppá.

Og so skrivar Tobbi eisini, at grundin til, at eingin broyting er hend innan flogvallarmálið, er, at lokalpolitikkur er komin uppí.

Eg meini tað!

Vit vita øll, at stigtakarnir til hesa hólmgongu eftir Vága Floghavn, eru Tobbi og Bill, saman við Poul og Lisbeth, og so sjálvandi Finnur, og hvat hava vit sæð?

Jú, í síðstu viku var sjarmutúrur heima hjá Tobba og Bill í Eysturoy, og hesa vikuna áttu so Poul og Finnur tørn á Hotel Tórshavn.

Er hetta ikki lokalt?

At enda vil eg siga hesi orð til Føroya fólk, sum hava fingið at vita, at tænastan verður so nógv betur, um vit fáa ein annan flogvøll.

Longri flogvøll, størri flogfør, og størri flogfør, færri fráferðir, so heldur ikki her hongur saman hjá flogvallagribbunum.

Til síðst vil eg heita á Tobba um ikki at koma við fleiri jólagávum, og heldur fara sakliga til verka eftir jóla.

Eron Debes